Komuna e Pejës ka njoftuar qytetarët se për shkak të një problemi, sipas tyre, serioz teknik në rrjetin qendror të Ministrisë së Punëve të Brendshme dhe Agjencionit të Regjistrit Civil të Kosovës, aktualisht është pamundësuar funksionimi normal i shumë prej shërbimeve administrative në këtë komunë.
“Ky problem, i shkaktuar nga ndërprerja e lidhjes me sistemin elektronik, ka ndikuar në pamundësinë për të përpunuar dhe lëshuar dokumente të rëndësishme si: certifikatat personale, ekstraktet familjare, dokumentet e identifikimit, si dhe shërbime të tjera, që varen nga ky sistem”, thuhet në njoftimin që ka shpërndarë kjo komunë për qytetarët.
Ata kanë treguar se as platforma E-Kosova dhe as sportelet e administratës nuk janë funksionale.
“Pavarësisht përkushtimit të stafit tonë për ofrimin e shërbimeve pa ndërprerje, kjo situatë është jashtë kompetencës së Komunës dhe zgjidhja e saj varet nga autoritetet qendrore. Jemi në kontakt të vazhdueshëm me institucionet përkatëse dhe do t’ju informojmë menjëherë sapo të rikthehet funksionaliteti i plotë i sistemit”, thuhet tutje në njoftim.
Ata i kanë bërë thirrje qytetarëve për mirëkuptimin dhe durim.
“Për rastet urgjente, ju ftojmë të paraqiteni në sportele për të marrë udhëzimet e nevojshme nga zyrtarët përgjegjës”, thuhet në njoftimin zyrtarë të lëshuar nga Komuna e Pejës, drejtuar qytetarëve.
