Komisioni për Administratë Publike, Pushtet Lokal, Media dhe Zhvillim Rajonal sot mban mbledhje të jashtëzakonshme me përfaqësuesit e Komisionit të Pavarur të Mediave (KPM), në lidhje me vendimin për kthimin e kanaleve të Serbisë të cilat shfaqen mesazhe mbështetëse për terroristët e rastit në Banjskë.
Mbledhja mbahet nga ora 13:00 në sallën N – 10 dhe është thirrur me nënshkrim e 4 deputetëve.
KPM-ja pak ditë më parë e shfuqizoi vendimin e saj të marrë më 3 tetor të vitit 2023, përmes të cilit kishte pezulluar kanalet sportive të “Arena”, pasi në to ishin shfaqur mesazhe e thirrje mbështetëse për terroristët e vrarë më 24 shtator 2023 në Banjskë.
Kështu këto kanale serbe tani po transmetohen në Kosovë përmes operatorit kabllor “ArtMotion”.
Ndërkohë këtij vendimi të KPM-së i është gëzuar kryeshefi ekzekutiv i “Telekom Serbia”, Vladimir Luçiq ai është shprehur i kënaqur me vendimin e Komisionit të Pavarur të Mediave në Kosovë për kthimin e kanaleve sportive “Arena”.
E kjo ka nxitur reagim në opinion dhe për rrjedhojë edhe nga një numër deputetësh që kanë thënë se është e papranueshme që kanalet ku bëhet propagandë kundër Kosovës dhe në favor të Serbisë e terroristëve, të lejohen të transmetohen në Kosovë.
