Koalicioni i OJQ-ve për Mbrojtjen e Fëmijëve – KOMF ka reaguar ashpër pas lajmit tronditës për gjetjen e një foshnje të porsalindur të pajetë pranë një deponie në Prishtinë, duke e cilësuar këtë ngjarje si një alarm të rëndë për të gjithë shoqërinë dhe institucionet përgjegjëse.
Përmes një njoftimi në Facebook, KOMF ka bërë thirrje për hetim të plotë, të shpejtë dhe transparent nga ana e organeve të rendit, me qëllim të zbardhjes së plotë të rrethanave të këtij rasti tragjik, identifikimin e përgjegjësve dhe ndëshkimin e tyre në përputhje me Kodin Penal të Republikës së Kosovës.
“Me dhimbje të thellë dhe shqetësim, KOMF reagon pas lajmit tronditës për gjetjen e një foshnje të porsalindur të pajetë pranë një deponie në Prishtinë. Kjo ngjarje është një alarm i dhimbshëm për të gjithë – për institucionet, sistemin e mbrojtjes së fëmijëve dhe shoqërinë në tërësi. Asnjë fëmijë nuk duhet të lindë apo të përfundojë jetën në këtë mënyrë”, thuhet në reagim.
KOMF gjithashtu ka theksuar nevojën për: Hetim të plotë dhe ndëshkim të fajtorëve,
Rivlerësim të mekanizmave parandalues për të identifikuar dhe mbështetur nënat në gjendje të rënduar sociale apo psikologjike,
Fuqizim të masave parandaluese përmes shërbimeve psiko-sociale dhe fushatave ndërgjegjësuese,
Angazhim institucional të menjëhershëm për të parandaluar përsëritjen e rasteve të ngjashme.
Në përfundim, KOMF i ka bërë thirrje të gjithë prindërve që ndodhen në vështirësi të kërkojnë ndihmë në Qendrat për Punë Sociale të komunave përkatëse, duke theksuar se mbështetja është e qasshme dhe se asnjë nënë nuk duhet të përballet e vetme me sfidat.
