Bekim Kupina, këshilltar për media i Presidentes së Kosovës Vjosa Osmani, ka reaguar ndaj ish-kryeministrit Isa Mustafa, i cili akuzoi Osmanin dhe kryeministrin Albin Kurti, se i kanë lënë qytetarët e Kosovës pa liberalizim të vizave.
Kupina ka thënë se Mustafa duhet ta ketë të qartë se deklarimet e Osmanit nuk kanë dhënë shpresa të rreme për qytetarët, por pritje realiste.
“Ju ia keni bërë hyzmetin, sot po i korrim frutat e politikës suaj të paaftë”, ka shkruar Kupina në Facebook.
Ai shtoi se Mustafës i ka munguar qartësia kur ka uruar Kosovën për liberalizimin e vizave në maj të vitit 2016, ndërsa tani flitet me argumente.
“Z. Mustafa, ju fatkeqësisht uruat para kohës. Ju fatkeqësisht ushqyet shpresën e rreme për qytetarët e këtij vendi, sërish para kohe. Ju në atë kohë përdorët pretendimin se ka kritere të veçanta për shtete të veçanta. Sot jemi këtu, pa e ngjallur shpresën e rreme, pa justifikime për kritere shtesë apo formulime të tilla. Mbase për ju z.Mustafa, urimi për liberalizimin më 2014 ende është valid! Apo, shpresoj ta keni ndërruar kalendarin”, ka shkruar Kupina.
Mustafa ka fajësuar të enjten Osmanin e Kurtin dhe kryetarin e Podujevës, Shpejtim Bulliqi, për mosliberalizim të vizave për Kosovën kur ishte në një pako me Ukrainën dhe Gjeorgjinë.
