Prokuroria Themelore e Pejës ka bërë kërkesë për caktimin e masës së paraburgimit ndaj për Agron Gashi, i cili dyshohet për vrasjen e rёndë nё tentativë e cila ndodhi në mbrëmjen e së mërkurës, ku mbetën të plagosur tre persona.
Lajmin e ka konfirmuar prokurori i rastit, Ersan Qavolli.
I njëjti po ashtu bëri të ditur se seanca për caktimin e masës së paraburgimit ndaj Gashit do të mbahet pasditen e sotme.
Lajmin për arrestimin e të dyshuarit Gashi të enjten e ka konfirmuar Shkodran Nikçi, zëdhënës i Prokurorisë Themelore në Pejë.
“Personi i dyshuar për vrasje të rëndë në tentativë, për plagosjen e tre personave, para pak momentesh është arrestuar dhe me vendim të prokurorit të shtetit është ndaluar për 48 orë”, tha Nikçi.
Mëngjesin e së enjtes, Policia e Kosovës (PK) përmes publikimit të fotografisë ka kërkuar nga qytetarët ndihmë për arrestimin e Gashit. Sipas Policisë, i dyshuari është recidivist i veprave penale, shkruan Betimi për Drejtësi.
Ndryshe, prokurori që po e trajton këtë rast, Ersan Qavolli ka konfirmuar po ashtu të enjten për “Betimi për Drejtësi” se lidhur me rastin e mbrëmshëm, pas mesnatës është arrestuar një i dyshuar për dhënie të ndihmës pas kryerjes së veprës penale.
Policia në mbrëmjen e së mërkurës konfirmoi se tre persona janë plagosur si pasojë e të shtënave me armë zjarri sonte në Pejë në rrugën “Bekim Berisha-Abeja”.
