Drejtori i Qendrës Kryesore të Mjekësisë Familjare (QKMF), Ilaz Kadrijaj, ka reaguar pas një vizite të paparalajmëruar nga kandidati i PDK-së në këtë institucion, duke e cilësuar veprimin si të papërshtatshëm dhe në kundërshtim me rregullat institucionale.
Përmes një reagimi zyrtar, Dr. Kadrijaj theksoi se QKMF mirëpret çdo iniciativë për bashkëpunim dhe avancim të shërbimeve, por vizitat dhe takimet me stafin duhet të organizohen përmes rrugëve zyrtare.
“Qendra Kryesore e Mjekësisë Familjare mirëpret çdo iniciativë për zhvillimin e takimeve me stafin tonë, me qëllim avancimin e shërbimeve dhe bashkëpunimit. Megjithatë, dëshiroj të theksoj se rregullat dhe procedurat janë të njëjta për të gjitha palët,” ka deklaruar drejtori i QKMF-së.
Ai shtoi se organizimi i aktiviteteve të tilla pa një njoftim paraprak për institucionin nuk është në përputhje me përgjegjësitë institucionale dhe se është obligim profesional të mbrohen këto parime.
“Do të kishte qenë më profesionale dhe etike që një vizitë e tillë të kërkohej zyrtarisht përmes institucionit tonë, dhe padyshim që do të ishte e mirëseardhur nga ana jonë. Organizimi i iniciativave pa një njoftim paraprak drejtuar QKMF-së nuk është praktikë që përputhet me përgjegjësitë tona institucionale. Si drejtues i këtij institucioni, e ndjej si obligim moral dhe profesional që të kujdesem për respektimin e këtyre rregullave, në mënyrë që bashkëpunimi të jetë gjithmonë i frytshëm dhe i rregullt,” ka theksuar Dr. Kadrijaj.
Reagimi vjen në një periudhë kur subjektet politike po intensifikojnë aktivitetet në kuadër të fushatës zgjedhore, ndërsa institucionet publike janë të obliguara të mbeten të paanshme dhe larg çfarëdo ndikimi politik.
