Gjykata Themelore në Gjakovë, gjatë ditës së sotme ka prezentuar gjytaren e re të kësaj gjykate, Kaltrina Halilaj.
Në postimin e Gjykatës Themelore në Gjakovë bëhet e ditur se Halilaj është një figurë e re dhe premtuese në sistemin gjyqësor të Republikës së Kosovës, duke shërbyer si gjyqtare në Gjykatën Themelore të Gjakovës. Me një përkushtim të palëkundur ndaj drejtësisë dhe një rrugëtim profesional të ndërtuar mbi punë të palodhshme, ajo ka krijuar një profil të dalluar në fushën juridike.
Halilaj rrugëtimin e saj akademik e nisi në vitin 2013, kur ajo hapi dyert e së ardhmes në Fakultetin Juridik të Universitetit të Prizrenit “Ukshin Hoti”. Me pasion dhe përkushtim, i përfundoi studimet në shtator të vitit 2017, për t’i vijuar më tej studimet edhe në nivelin pasuniversitar.
Ndërsa hapat e parë në rrugëtimin profesional, Halilaj i hodhi në vitin 2018, kur nisi një praktikë njëvjeçare në Gjykatën Themelore në Gjakovë, ku njohu nga afër mekanizmat e drejtësisë, por edhe dëshmoi veten si një juriste e përkushtuar.
Tutje, pas përfundimit me sukses të provimit të jurisprudencës më 16 dhjetor 2021, ajo vijoi rrugëtimin e saj duke marrë postin e bashkëpunëtores profesionale në qershor të vitit 2022. Përkushtimi dhe puna e palodhshme e saj kulmuan më 26 gusht 2024, kur ajo u emërua Gjyqtare e Republikës së Kosovës, duke marrë përsipër trajtimin e lëndëve nga lëmia civile.
