Larry Ellison, miliarderi amerikan dhe bashkëthemeluesi i kompanisë së teknologjisë Oracle, është bërë personi më i pasur në botë, duke kaluar Elon Musk. Kjo ndodhi pasi aksionet e kompanisë Oracle u rritën me mbi 40% në tregun e aksioneve vetëm të mërkurën, një rritje rekord për kompaninë, duke fituar të paktën 101 miliardë dollarë.
Sipas indeksit të miliarderëve të Bloomberg, pasuria e Ellison tani vlerësohet rreth 393 miliardë dollarë, ndërsa pasuria e Musk ka rënë në 384 miliardë dollarë. Kjo është hera e parë që Ellison merr vendin e parë në listën e më të pasurve.
Rritja e madhe në vlerën e Oracle erdhi pasi kompania raportoi rezultate financiare më të mira se sa pritej, falë rritjes së kërkesës për shërbimet e saj të “cloud”-it nga kompani që punojnë me inteligjencën artificiale.
Larry Ellison zotëron 41% të aksioneve të Oracle, dhe kjo përbën pjesën më të madhe të pasurisë së tij. Përveç Oracle, Ellison ka investime edhe në Tesla, një ekip garash me vela, turneun e njohur të tenisit në Indian Wells, dhe madje është pronar i një ishulli në Hawaii.
Ai ka një lidhje të afërt me Elon Musk, dhe më parë ka shërbyer edhe në bordin drejtues të kompanisë Tesla. Madje, Ellison investoi 1 miliard dollarë në blerjen e Twitter-it nga Musk .
Të dy, Ellison dhe Musk, kanë lidhje të ngushta edhe me politikën amerikane dhe ish-presidentin Donald Trump. Ellison ka qenë një përkrahës i tij dhe ka marrë pjesë në disa projekte të mëdha në SHBA që lidhen me teknologjinë dhe inteligjencën artificiale.
Ndërkohë, Elon Musk ka humbur vendin e parë në listën e miliarderëve pas më pak se një viti, pasi e kishte rimarrë atë nga Jeff Bezos dhe Bernard Arnault.
