Joao Felix është lënë jashtë listës së Chelseat për Kupën e Botës për Klube, dhe Benfica mund të jetë rruga e tij e daljes, pasi trajneri Bruno Lage ka pranuar mundësinë e një rikthimi të lojtarit në Lisbonë.
Trajneri i Benficës konfirmoi interesimin e klubit për të rikthyer në skuadër sulmuesin portugez, por paralajmëroi se kushtet financiare për të mbyllur marrëveshjen janë pengesa kryesore.
Felix, i cili aktualisht nuk bën pjesë në planet e Chelseat për turneun në SHBA, kaloi gjysmën e dytë të sezonit 2024/2025 në huazim te Milani, pas një pjese të parë të dobët me ‘Blutë e Londrës’.
Ai u largua nga Benfica për te Atletico Madrid në vitin 2019 për një shumë rekord prej 120 milionë eurosh. Ndërsa një rikthim në Lisbonë mbetet i mundshëm, Lage theksoi se çdo lëvizje varet nga përputhja e interesave me përballueshmërinë financiare.
E ardhmja e Felix te Chelsea duket gjithnjë e më e paqartë. 25-vjeçari nuk është përfshirë në skuadrën e trajnerit Enzo Maresca për në Shtetet e Bashkuara dhe numri i tij i fanellës (14) i është dhënë tashmë transferimit të ri Dario Essugo.
Felix pati vështirësi për të fituar minuta në ‘Stamford Bridge’ dhe pati ndikim minimal edhe në Itali, ku shënoi vetëm tre gola në 21 paraqitje me Milanin.
“Joao ka folur tashmë për këtë situatë. Të gjithë lojtarët do të donin të riktheheshin te Benfica. Ne duhet të krijojmë mundësinë dhe ata duhet të tregojnë se duan të kthehen”.
“Duhet të bashkojmë këto dy dëshira. Por aspekti financiar është shumë i rëndësishëm. Joao u largua katër vite më parë për 120 milionë euro dhe tani ka një kosto, qoftë për huazim apo përqindje transferimi”.
“Nga ana tjetër, është edhe paga e lojtarit. Ka shumë dëshirë, por edhe pengesa financiare, në të dy anët”, ka thënë Lage./
