Në një epokë kur smartfoni nuk është më vetëm një telefon, por edhe agjendë, televizor, gazetë dhe videolojë, një qytet japonez ka vendosur të japë një mesazh kundër përdorimit të tepruar të ekraneve.
Në Toyoake, në prefekturën Aichi, asambleja bashkiake ka miratuar një urdhëresë që u kërkon banorëve të kufizojnë përdorimin e përditshëm të smartfonëve dhe tabletëve në maksimumi dy orë në ditë, jashtë punës dhe studimit. Qëllimi është të kundërshtohen efektet e mundshme të dëmshme që përdorimi i zgjatur i pajisjeve mund të ketë mbi shëndetin.
Megjithatë, nuk bëhet fjalë për një ndalim. Urdhëresa nuk parashikon sanksione për ata që e kalojnë këtë kufi dhe synon të jetë mbi të gjitha një udhëzim edukativ dhe shoqëror. Teksti, edhe pse pranon se smartfonët dhe tabletët janë “të dobishëm dhe të domosdoshëm në jetën e përditshme”, rekomandon që nxënësit e shkollave fillore dhe fëmijët më të vegjël të ndalojnë përdorimin e tyre deri në orën 21:00, ndërsa nxënësit e shkollave të mesme dhe të rriturit duhet ta ndërpresin përdorimin deri në orën 22:00.
Frika është se një përdorim i tepruar, sidomos në orët e mbrëmjes, mund të dëmtojë cilësinë dhe sasinë e gjumit, me pasoja mbi mirëqenien fizike dhe mendore. Urdhëresa i inkurajon familjet të vendosin rregullat e tyre për përdorimin e pajisjeve, në mënyrë që përdorimi i smartfonëve dhe tabletëve të jetë “i përshtatshëm”, dhe kërkon edhe bashkëpunimin e qytetit dhe të shkollave në këtë përpjekje.
Nga ana tjetër, sipas një sondazhi të publikuar një vit më parë nga Children and Families Agency, të rinjtë japonezë kalojnë mesatarisht pak më shumë se pesë orë në ditë online gjatë ditëve të javës.
Nuk është hera e parë që në Japoni tentohet të ndërhyhet në këtë drejtim. Që në vitin 2020, prefektura e Kagawa kishte vendosur një urdhëresë, edhe ajo jo detyruese, që rekomandonte kufizimin e kohës së lojërave për fëmijët në një orë gjatë ditëve të javës dhe 90 minuta gjatë pushimeve shkollore. Për djemtë dhe vajzat nga 12 deri në 15 vjeç sugjerohej që të mos përdornin smartfonin pas orës 21:00, ndërsa për grupmoshën 15 deri në 18 vjeç kufiri shtyhej në 22:00.
Këtë herë, megjithatë, risia është se thirrja nuk u drejtohet vetëm më të rinjve. Duke paraqitur masën, kryetari i bashkisë iu referua edhe të rriturve, duke folur për prindër “të ngjitur” pas ekranit në momentet kur duhet të flenë ose të kalojnë kohë me familjen.
