Izraeli po intensifikon bastisjen e vazhdueshme në spitalin Shifa në qytetin e Gazës. Vetëm në 24 orët e fundit janë vrarë mbi 50 terroristë të dyshuar.
Që nga e hëna, ushtria izraelite thotë se ka vrarë më shumë se 140 milici në betejat brenda dhe përreth spitalit. Sipas ushtrisë, ushtarët izraelitë kanë gjetur depo armësh dhe “infrastrukturë që i përkasin grupeve terroriste” gjatë goditjes, raportojnë mediat izraelite.
Të dhënat izraelite nuk mund të verifikoheshin nga burime të pavarura.
Spitali, i cili është më i madhi në Rripin e Gazës, thuhet se është krejtësisht jashtë funksionit. Stafi i kujdesit shëndetësor raportohet të jetë i bllokuar në ambientet pa ushqim, ujë, energji elektrike apo mundësi për të trajtuar pacientët e tyre.
Sipas Al Jazeera, një numër njerëzish janë vrarë kur Izraeli bombardoi zonën përreth al-Shifa me raketa dhe artileri. Disa ndërtesa në afërsi të spitalit janë bombarduar, raporton kompania mediatike duke iu referuar korrespondentit të saj në terren.
“Ushtria izraelite tani po urdhëron të gjithë brenda spitalit, përfshirë stafin mjekësor dhe pacientët, që të evakuohen menjëherë. Përndryshe, i gjithë kompleksi do të hidhet në erë, tha gazetari Hani Mahmoud.
