Policia e Kosovës ka njoftuar se është gjetur i vetëvrarë, personi i cili para disa ditësh ishte raportuar i zhdukur.
Bëhet fjalë për 30-vjeçarin nga Ferizaj, Leonard Mahmuti, i cili më 28 shkurt kishte dalë nga shtëpia në mesnatë dhe nuk ishte kthyer më.
Policia ka thënë se në konkludimin për vetëvrasje, kanë arritur pas ekzaminimit të vendit të ngjarjes dhe rrethanave.
Njoftimi i plotë nga Policia:
Vetëvrasje në Ferizaj
Sot, rreth orës 07:30 Policia Rajonale e Ferizajt ka pranuar një informacion se në pyllin e fshatit Sojevë të Ferizajt, dyshohej se një person është pa shenja jete. Policët e rendit e më pas hetuesit dhe krimteknikët rajonal kanë dalë në vendin e ngjarjes. Nga hetimet e para, egzaminimit të vendit të ngjarjes viktima L.M (M/K) i moshës 30 vjeçar nga fshati Rahovicë e Ferizajt dyshohet se kishte kryer vetëvrasje, vdekja e të cilit është konfirmuar në vendin e ngjarjes nga mjekët kujdestar të spitalit rajonal të Ferizajt.
Me vendim të prokurorit kujdestar nga Prokuroria Themelore në Ferizaj trupi i pajetë i është liruar familjarëve .
Personi në fjalë ditë me parë ishte shpallur i zhdukur dhe Policia kishte kërkuar bashkëpunim nga qytetarët për identifikimin dhe vendodhjen e tij.
Kujtojmë se Policia e Kosovës ka kërkuar ndihmën e qytetarëve për gjetjen e personit të zhdukur Leonard Shefki Mahmuti, i cili nga 28 shkurti ka dalë nga shtëpia e tij dhe nuk dihet asgjë për vendndodhjen e tij.
Në njoftimin e Policisë thuhej se në bazë të autorizimit nga Prokuroria Themelore në Ferizaj, për publikimin e fotografive të personave në kërkim/personave të zhdukur, lëshon kërkesë për bashkëpunim me qytetarët me qëllim identifikimin dhe vendndodhjen e personit të zhdukur. “Personi i zhdukur është: Leonard (Shefki) Mahmuti, i lindur më datë 07.09.1993 me vendbanim në fshatin Rahovicë të Ferizajt. Policia kërkon nga qytetarët që, kushdo që ka ndonjë informacion rreth këtij personi për vendndodhjen e tij, të lajmërojnë menjëherë policinë, stacionin më të afërt, apo përmes aplikacionit digjital ‘Lajmëro Policinë’ dhe në numrat kujdestarë: 192 ,0290/326-250, 0290/322-406. Të dhënat e juaja do të ruhen në konidencialitet të plotë”, thuhej në njoftim.
