Fiona Hill është njëra nga ekspertet më të njohura në botë mbi Rusinë. Ajo ka qenë këshilltare në Shtëpinë e Bardhë gjatë mandatit të parë të presidentit Donald Trump. Për dallim nga shumë ekspertë, ajo qëmoti ka paralajmëruar mbi rrezikun që i kanoset Evropës nga Rusia e Vladimir Putinit. Hill është britanike, por ka edhe shtetësi amerikane. Për gazetën “The Guardian” ajo ka folur mbi sfidat aktuale të sigurisë.
Fiona Hill ka qenë këshilltarja kryesore për Rusinë në Shtëpinë e Bardhë gjatë mandatit të parë të Donald Trumpit. Tani ajo ka bashkëpunuar me qeverinë britanike në hartimin e strategjisë së saj mbrojtëse. Në një intervistë dhënë gazetës “The Guardian”, Hill i bëri thirrje Britanisë së Madhe t’i përgjigjet kërcënimeve duke qëndruar më e bashkuar. Ajo tha se Rusia është në luftë me Britaninë e Madhe, ndërsa Shtetet e Bashkuara nuk janë më aleate të besueshme.
“Jemi në telashe të mëdha”, nënvizoi Hill, duke e përshkruar pozitën gjeopolitike të Britanisë si të kapur “mes shkëmbit” që është Rusia e Vladimir Putinit dhe “vendit të ngushtë” që është SHBA-ja gjithnjë e më e paparashikueshme e Donald Trumpit.
Hill, 59 vjeçe, është njëra nga tre ekspertët e emëruar nga Partia Laburiste, krahas Lordit Robertson, ish-sekretar i përgjithshëm i NATO-s, dhe gjeneralit të pensionuar Sir Richard Barrons. Ajo i tha gazetës “Guardian” se ishte e gatshme të merrte këtë detyrë, sepse bëhet fjalë për një “pikë kthese shumë të rëndësishme në politikën botërore”.
“Rusia është forcuar si kundërshtare në një mënyrë që ndoshta nuk e kishim parashikuar plotësisht”, deklaroi Hill. Sipas saj, Putini e sheh luftën në Ukrainë si një pikënisje për ta bërë Moskën “një fuqi ushtarake dominuese në të gjithë Evropën”
Në kuadër të kësaj përpjekjeje afatgjatë, Rusia po e kërcënon Mbretërinë e Bashkuar “në forma të ndryshme”, tha Hill dhe përmendi “helmime, atentate, akte sabotazhi, të gjitha format e sulmeve kibernetike dhe të ndërhyrjes”.
“Po shohim se po vendosin sensorë rreth tubacioneve kritike dhe po përpiqen të shkatërrojnë kabllo nënujore”.
Nga e gjithë kjo Hill arrin në përfundimin se “Rusia është në luftë me ne”. Ekspertja e politikës së jashtme, e cila i ka vëzhguar dhe analizuar zhvillimet në Rusi prej vitesh, tha se kishte paralajmëruar mbi rrezikun që më 2015 kur në një libër me një bashkautor analizoi veprimet e presidentit rus pas pushtimit dhe aneksimit të Krimesë.
“Ne thamë se Putini i kishte shpallur luftë Perëndimit” por, sipas saj, ekspertët e tjerë nuk ishin dakord.
Ngjarjet që pasuan, sipas Fiona Hill, treguan se “ai me të vërtetë e kishte bërë këtë, dhe ne nuk ia vumë veshin”.
Putini beson se Ukraina tashmë i ka shkëputur lidhjet me SHBA-në, tha Hill, sepse “Trump dëshiron të ketë një marrëdhënie të veçantë me Putinin, për të arritur marrëveshje për kontrollin e armëve dhe gjithashtu për të bërë biznese që ndoshta do ta pasurojnë më tej rrethin e tij, megjithëse Putinit nuk i duhet më pasurim”.
Në fushën e mbrojtjes, Mbretëria e Bashkuar nuk mund të mbështetet më në ombrellën ushtarake të SHBA-së si në Luftën e Ftohtë apo në vitet pasuese – të paktën “jo në mënyrën siç jemi mësuar”.
Në raportin e publikuar këtë javë për mbrojtjen thuhet se “supozimet afatgjata të Britanisë për rendin dhe strukturat e fuqisë globale nuk janë më të sigurta”. Raporti i është prezantuar kryeministrit Keir Starmer, ministres së Financave Rachel Reeves dhe ministrit të Mbrojtjes John Healey.
Hill nuk pranoi të thotë nëse i ka dhënë këshilla qeverisë britanike për menaxhimin e marrëdhënies me Donald Trumpin, por shtoi: “Këshilla që do të jepja është ajo që do të jepja në mënyrë publike”. Ajo vetëm shtoi se Shtëpia e Bardhë nën Trumpin “nuk është qeveri, por një oborr mbretëror”, ku një president i orientuar nga transaksionet udhëhiqet nga “dëshirat dhe interesat e tij personale, dhe zakonisht dëgjon personin e fundit që e ka takuar”.
Hill argumentoi se Britania ka nevojë për më shumë unitet të brendshëm për të mbrojtur veten në një kohë pasigurie të thellë.
“Nuk mund të mbështetemi më te askush”, tha ajo. Britania ka nevojë për një “mendësi ndryshe” që mbështetet si në mbrojtjen tradicionale, ashtu edhe në qëndrueshmërinë sociale. Hill shtoi se deindustrializimi dhe pabarazia në rritje në Rusi dhe SHBA kanë ndikuar në rritjen e populizmit nacionalist në të dy vendet.
