Ish-guvernatori i Bankës Qendrore të Kosovës, Fehmi Mehmeti, në periudhën e qarkullimit të lajmeve të shpeshta për qarkullimin e parave të falsifikuara, ka bërë thirrje ndaj qytetarëve për shmangie të pagesave ‘cash’.
“Thirrja ime për qytetarët është që duhet të shmangin pagesat me ‘cash’, pasi mundësitë për të rënë në kontakt me monedhë- kartëmonedhë të falsifikuara janë më të mëdha”, ka shkruar Mehmeti.
Ai ka thënë se një nga metodat për të evituar mundësinë e manipulimit është që pagesat t’i kryejnë nëpërmjet bankave. Një hap tjetër që Mehmeti ka përmendur ka qenë edhe mbajtja e trajnimeve dhe seminareve nga BQK dhe institucionet tjera ekonomike, në mënyrë që qytetarët të njoftohen për sigurinë e qarkullimit të parasë.
“Çdo biznes, por edhe qytetari do të duhet të jetë i kujdesshëm në qarkullimin e kartëmonedhave. Veprimet financiare me monedha-kartëmonedha duhet t’i bëjnë nëpërmjet bankave për të evituar keqkuptimet, për të evituar mundësinë që dikush në një moment të caktuar t’i pasojë një monedhë- kartëmonedhë të dyshuar si të falsifikuar”, ka shkruar ish-kreu i BQK-së.
