Instituti Kombëtar i Shëndetit Publik të Kosovës ka njoftuar se ka filluar ofrimin e testimit laboratorik me QuantiFERON-TB Gold Plus (QFT-Plus), një metodë moderne për zbulimin e infeksionit latent me tuberkuloz.
Ky test bazohet në analizën e gjakut dhe mat përgjigjen imunitare ndaj Mycobacterium tuberculosis, duke ofruar ndjeshmëri dhe specifikë të lartë, pa u ndikuar nga vaksinimi BCG dhe duke kërkuar vetëm një vizitë për marrjen e mostrës.
Testimi realizohet vetëm në laboratorin referent nacional të tuberkulozës në IKSHPK, me referim nga mjeku, ndërsa rezultatet interpretohen sipas udhëzimeve ndërkombëtare dhe kontekstit klinik të pacientit.
IKSHPK thekson se ky shërbim përforcon kapacitetet diagnostike për parandalimin dhe kontrollin e tuberkulozit në Kosovë.
