Instituti i Kosovës për Drejtësi (IKD) ka dorëzuar padi në Gjykata Supreme e Republikës së Kosovës kundër Ministria e Shëndetësisë, duke kërkuar shfuqizimin e disa dispozitave të Udhëzimit Administrativ Nr. 03/2024 për bashkëpagesat në shërbimet shëndetësore.
Padia kundërshton pikën 4 të Shtojcës 3 dhe pikën 5 të Shtojcës 4, të cilat parashohin pagesën prej 3 euro në ditë për personin shoqërues të pacientit mbi moshën 15 vjeç gjatë qëndrimit në spital.
Sipas IKD-së, këto dispozita janë të kundërligjshme, pasi përmes një akti nënligjor është krijuar një kategori e re tarifimi që nuk ka bazë në Ligjin për Shëndetësi. Në padi theksohet se bashkëpagesa, sipas ligjit, lidhet me shfrytëzimin e shërbimeve shëndetësore nga pacienti, ndërsa shoqëruesi nuk është përfitues i trajtimit mjekësor dhe nuk mund të konsiderohet “shfrytëzues i shërbimeve shëndetësore”.
IKD vlerëson se Ministria ka tejkaluar kompetencat, duke zgjeruar përmes aktit nënligjor konceptin e “shërbimit shëndetësor” përtej përcaktimeve ligjore. Po ashtu, në padi përmendet edhe reagimi i Shërbimi Spitalor Klinik dhe Universitar i Kosovës (SHSKUK), i cili ka sqaruar se tarifa lidhet me shfrytëzimin e hapësirave dhe resurseve spitalore nga persona që nuk janë pacientë.
IKD e ka ngritur padinë në mbrojtje të interesit publik, duke vlerësuar se tarifa prej 3 euro në ditë krijon barrë shtesë financiare për familjet dhe cenon të drejtat e qytetarëve, veçanërisht kur prania e shoqëruesit shpesh është domosdoshmëri në praktikën spitalore
