Policia e Kosovës ka njoftuar për tri raste të hetimeve të vdekjes në 24 orët e fundit në Kosovë.
Në një rast, që ka ndodhur në Gjilan në mëngjesin e të shtunës, Policia ka thënë se një personi i ishte keqësuar gjendja derisa ishte duke prerë një kafshë dhe ai u dërgua në qendrën Emergjente ku u konstatua vdekja e tij nga mjeku kujdestar.
“Gjilan 03.02.2024, 10:30. Viktima mashkull kosovar deri sa ishte duke prerë një kafshë iu kishte keqësuar gjendja e tij shëndetësore dhe i njëjti ishte dërguar në qendrën Emergjente, ku mjeku kujdestar e kishte konstatuar vdekjen e tij . Me vendim të prokurorit trupi i pajetë është dërguar në IML për obduksion”, thuhet në raportin e Policisë.
Në një rast tjetër, po ashtu në Gjilan, është gjetur pa shenja jete në dhomën e tij një person në orët e vona të së premtes. Trupi i tij është dërguar për obduksion në IML.
E në Gjakovë të shtunën një person është gjetur pa shenja jete në banesën e tij.
“Gjakovë 03.02.2024, 13:00. Është raportuar se një person gjendet pa shenja jete në banesën e tij. Njësitë policore si dhe stafi mjekësor kanë dal në vendin e ngjarjes dhe kanë hasur në viktimën mashkull kosovar, i cili ishte shtrirë në dysheme ku nga mjeku kujdestar është konstatuar vdekja e tij. Me vendim të prokurorit trupi i pa jetë është dërguar në IML për obduksion”, thuhet në raport.
