Ish zyrtari i Departamentit amerikan të Shtetit, dhe njohës i Ballkanit, James Hooper, ka ngritur shqetësimin se momenti diplomatik ndërkombëtar i Kosovës po shkon drejt një ngërçi.
Në një intervistë për Telegrafin, Hooper tha se procesi i njohjes së Kosovës duket se ka mbetur pa ajër, ndërsa dialogu me Serbinë është bërë një rrugë pa dalje.
Ai vë në dukje se disa prej aleatëve më të rëndësishëm të Kosovës po fajësojnë Prishtinën për qasje jo konstruktive që nuk po sjellin përparime në proces.
“Koha po mbaron. Në këto kohë të turbulencave, mjedisi i sigurisë është vënë në rrezik të madh, ku nuk ka më vend për gabime,” thotë Hooper dhe shton se kjo situatë kërkon mençuri në udhëheqje dhe një perspektivë të re nga Prishtina.
Më tej thekson se kryeministri Albin Kurti ka një mundësi të artë për të ndihmuar në këtë proces riformimi, duke qenë se procesi diplomatik për Ballkanin Perëndimor duket se ka humbur orientimin.
Hooper argumenton se liderët e Kosovës nuk guxojnë të qasen në trajtimin e kësaj sfide me një ritëm të ngadaltë, pasi Perëndimi mund të zbehë procesin e dialogut, dhe kjo gjë të zvarritet edhe më tej.
“Mungesa e presionit ndërkombëtar po lë vend për një politikë të paqëllimshme që është bërë shpërqendrim nga përpjekjet për një të ardhme konstruktive midis dy shteteve,” thotë ai.
Ai argumenton se Dialogu i shumëpërfolur, në vend që të jetë një proces zgjidhjeje, po bëhet një shpërqendrim nga synimi për të ndërtuar marrëdhënie të forta midis Kosovës dhe Serbisë.
Hooper nënvizon nevojën për një përpjekje të madhe për të mbrojtur interesat e përbashkëta dhe trajtimin e Serbisë si më shumë se një fqinj, por jo në aspektin si një vend mik…
Ish-diplomati amerikan, paralajmëron për pasojat e një diplomacie të plogësht dhe të paqartë, ku grupe të caktuara mund të kthehen në veprime ekstreme si një rezultat i një ngërçi diplomatik, duke rritur kështu rrezikun e marrëdhënieve ndërkombëtare në rajonin e Ballkanit.
“Pra, ekziston një lidhje midis urgjencës dhe qëllimit. Banjska tregoi rreziqet që mund të ndodhin si pasojë e zbehjes së procesit të dialogut”, u shpreh Hooper
