Besnik Mustafaj, ish-ministër i Jashtëm, në Intervistë me Merita Haklaj, në 15-vjetorin e Pavarësisë së Kosovës, foli edhe për krijimin e asociacionit të komunave me shumicë serbe. Ai theksoi se nuk duhej në asnjë negociatë të pranohej tejkalim i parashikimeve në planin Ahtisari.
“Aktualisht është një situatë delikate për Kosovën. Shoqata e komunave serbe është një shpikje e lindur në vitin 2013 kur kryeministër ishte Hashim Thaçi. Që atëherë, unë kam menduar që ka qenë një budallallëk që e kanë pranuar. Maksimumin e lëshimeve, Kosova dhe klasa e saj politike ia kishin bërë serbëve nëpërmjet planit Ahtisarit i sanksionuar edhe në Kushtetutë, ku për 4 përqind të popullsisë që është serbe parashikohet një numër deputetësh 10 apriori.
Nuk duhej në asnjë negociatë të pranohej tejkalim i parashikimeve në planin Ahtisari. Duhej bërë maksimumi për zbatimin e të gjitha premtimeve në atë plan. Krijimi i kësaj bashkësie ishte një hile e madhe sepse me 4 përqind të popullsisë do të kishim një territorializim që përfshinte mbi 25 përqind të territorit”, tha Mustafaj.
