Partia më e madhe serbe në Kosovës, Lista Serbe deri më tani nuk ka reaguar lidhur me sulmin terrorist që u bë ndaj Policisë së Kosovës në veri, ku mbeti i vrarë një polic dhe një tjetër u plagos.
Për heshtjen e këtij subjekti politik ka reaguar edhe ambasadori gjerman në Kosovës, Jorn Rohde.
Ai në një postim në platformën “X” ka shkruar se kur Lista Serbe do ta ndalë këtë heshtje.
“Si e gjithë bota përfshirë edhe Kishën Ortodokse Serbe, janë të tronditur dhe dënuan ngjarjen e djeshme: Pyes veten nëse edhe Lista Serbe do ta ndalë heshtjen dhe do të na bashkohet të gjithëve në qëndrimin tonë të qartë kundër këtij sulmi vrastar ndaj Policisë së Kosovës”, ka shkruar Rohde.
Ndryshe reagim për ngjarjen tragjike ka pasur edhe nga ministri nga komuniteti Nenad Rashiq.
Kujtojmë se ditë më parë nënkryetari i Listës Serbe, i cili është edhe në listën e personave të sanksionuar nga SHBA-të, Milan Radoiçiq javë më parë kërcënoi kryeministrin Albin Kurti duke thënë se “koha do të tregojë se kush do të pësojë dhe do të paguajë në fund”.
As the whole world incl. SOC is shocked and condemns yesterday’s events: I wonder whether also Srpska Lista will stop its silence and join us all in our clear stance against this murderous attack on @Kosovo_Police.
— Ambassador Jörn Rohde (@GermanAmbKOS) September 25, 2023
Edhe emisari gjerman për Ballkanin Perëndimor, Manuel Sarrazin, e ka quajtur sulm kriminal dhe terrorist ndaj Policisë së Kosovës, ngjarjen e ndodhur të dielën në veri të vendit.
Pas takimit të zhvilluar të hënën me kryeministrin Albin Kurti, Sarrazini ka thënë se të dielën është parë një situatë e tmerrshme.
“Dje pamë një situatë të tmerrshme. E dënojmë fuqishëm këtë sulm kriminal dhe terrorist ndaj Policisë së Kosovës. Jemi këtu për të shprehur solidaritetin dhe ngushëllimet për familjarët, policinë e Kosovës dhe të gjithë shtetin”, ka thënë mes tjerash ai.
Sarrazin ka ardhur në Kosovë një ditë pas sulmeve terroriste të organizuara nga grupe të uniformuara serbe në Banjskë të Zveçanit ku u vra një polic i Kosovës dhe tre të tjerë u lënduan.
Ndërkohë institucionet për zbatimin e ligjit, Policia e Kosovës dhe Prokuroria po vazhdojnë edhe sot angazhimet në veri të vendit dhe janë duke i lokalizuar disa shtëpi dhe automjete në Banjskë të Zveçanit, në të cilat dyshohet se ka armatim si dhe po punohet ende për të identifikuar persona tjerë të dyshuar lidhur me sulmin terrorist ku mbeti i vrarë një polic.
