Dhjetëra nxënëse iraniane në pesë provinca janë pranuar në spital në një valë të re të sulmeve të dyshuara me helmim, sipas mediave lokale.
Qindra raste të shqetësimit me frymëmarrjen janë raportuar gjatë tre muajve të fundit në mesin e nxënëseve kryesisht në qytetin Qom, në jug të Teheranit, me disa që kanë nevojë për trajtim spitalor.
Agjencitë e lajmeve Tasnim dhe Mehr raportuan valën e fundit të helmimeve në provincën perëndimore Hamedan, si dhe Zanjan, Fars në jug dhe provincën Alborz në veri.
Dhjetëra janë transferuar në spitalet lokale për trajtim.
Të premten, presidenti Ebrahim Raisi tha se kishte kërkuar nga ministrat e inteligjencës dhe të brendshëm që të ndjekin rastet e helmimeve, duke i përshkruar ato si “komplot i armikut për të krijuar frikë dhe dëshpërim në popull”.
Zëdhënësi i Ministrisë së Jashtme, Nasser Kanaani, tha se një hetim mbi helmimet ishte “një nga prioritetet imediate të qeverisë, për të lehtësuar shqetësimet e familjeve dhe për t’i mbajtur autorët përgjegjës”.
Të mërkurën, të paktën 10 shkolla për vajza u vunë në shënjestër të sulmeve me helmim.
Javën e kaluar, zëvendësministri i shëndetësisë i Iranit, Younes Panahi, tha se helmimet kishin për qëllim mbylljen e arsimit për vajzat.
Helmimet vijnë më shumë se pesë muaj pas protestave mbarëkombëtare pas vdekjes në paraburgim të Mahsa Aminit, e cila ishte arrestuar për një shkelje të rregullave të rrepta të veshjes për gratë.
