Serbia është vendi më i pasigurt dhe më i rrezikshëm në Evropë, për këdo nga Republika e Kosovës, ka thënë të enjten sekretari i zyrës ndërlidhëse të Kosovës në Beograd, Fatmir Haxholli, pas lajmit se një 19-vjeçar nga Kosova vdiq si pasojë e therjes me thikë në pikën kufitare mes Serbisë dhe Kroacisë.
“Nuk ka gjë më të trishtë, se kur një i ri humb jetën, duke ëndërruar një jetë më të mirë. Tragjedi! Nga Beogradi, Serbia, e them se Serbia, për këdo nga Republika e Kosovës, është vendi më i pasigurt dhe më i rrezikshëm në Evropë. Kështu do të mbetët derisa fryma anti-Kosovë, në Serbi, frynë në veri, jug, lindje dhe perëndim të këtij vendi”, ka shkruar ai në Facebook. “Nuk ka rëndësi çfarë pasaporte keni, nëse flisni shqip, jeni nga Kosova dhe keni shkelur brenda kufijve të këtij vendi, ju keni vendosur jetën tuaj dhe të bashkudhëtarëve tuaj në lojë”.
Sh.M. u ther për vdekje në fshatin Batrovc, kanë raportuar mediumet serbe të enjten. Ai dyshohet se ishte me një shok të tij gjatë kohës kur ishte sulmuar. Policia në Serbi ka thënë se po punon për zbardhjen e vrasjes.
Për rastin ka reaguar edhe Ministria e Punëve të Jashtme dhe Diasporës, që ka thënë se rrethanat për vdekjen e tij s’janë sqaruar ende, por se s’ka indikacione për vdekje të shkaktuar nga ana e autoriteteve serbe.
