Ministrja e Drejtësisë, Albulena Haxhiu, ka reaguar pas veprimit të Partisë Demokratike të Kosovës (PDK), e cila ka dërguar Ligjin për Byronë për Konfiskimin dhe Sekuestrimin e Pasurisë së Pajustifikueshme në Gjykatën Kushtetuese.
Në një postim në rrjetet sociale, Haxhiu theksoi se ky hap tregon frikën e thellë të PDK-së nga ky ligj, i cili sipas saj, mund të prekojë thelbin e korrupsionit që kjo parti ka kultivuar gjatë viteve.
“Me këtë veprim, është e qartë se angazhimi i tyre politik nuk ka më të bëjë me aspirata apo vizione për të ardhmen, por thjesht me një përpjekje të dëshpëruar për të mbrojtur pasurinë kolosale të fituar padrejtësisht në të kaluarën”, ka shkruar Haxhiu.
Ministrja theksoi gjithashtu se kjo është një luftë për të mbajtur pasurinë e grabbitur, ndërsa theksoi se më 9 shkurt do të përballen interesat e ngushta të PDK-së me vullnetin popullor për një qeverisje të drejtë dhe luftë ndaj krimit të organizuar e korrupsionit.
“Ju mund të na vononi, por kurrë nuk do ta ndalni vullnetin e popullit për drejtësi. Byroja do të bëhet, pasuria do t’i kthehet shtetit dhe qytetarëve. Drejtësia do të mbizotërojë!”, ka përfunduar ministrja.
