Nënkryetarja e Kuvendit dhe ish-ministrja e Drejtësisë, Albulena Haxhiu, ka reaguar sot lidhur me zhvillimet në Këshillin Prokurorial të Kosovës, ku ditë më parë është shkarkuar nga pozita e ushtruesit të detyrës së kryeprokurorit të Shtetit, Besim Kelmendi.
Sipas saj, KPK “prej kohësh është i kapur nga grupe interesi”, të cilat nuk e kanë për prioritet përmirësimin e sistemit prokurorial, por “mbrojtjen e interesave të tyre dhe të individëve jashtë Këshillit”. Ajo e përshkroi situatën si “realitet të hidhur, por të pamohueshëm”.
Haxhiu njoftoi se reforma në KPK pritet të hyjë në fuqi në janar të vitit 2026, duke e cilësuar atë “hap të domosdoshëm për rikthimin e integritetit të institucionit”.
Ajo kujtoi se reformat në drejtësi kanë nisur në vitin 2021, me synim heqjen e kontrollit të “një rrethi të ngushtë njerëzish”, rritjen e transparencës e llogaridhënies, eliminimin e ndikimit të grupeve të interesit, forcimin e meritokracisë dhe krijimin e një institucioni që funksionon në shërbim të publikut.
Sipas Haxhiut, shumica e anëtarëve aktualë të KPK-së e kanë kundërshtuar këtë reformë që nga fillimi dhe kanë tentuar ta bllokojnë “me çdo mjet të mundshëm”. Por ajo theksoi se nuk kanë arritur dhe nuk do të arrijnë, sepse “drejtësia dhe interesi publik nuk mund të ndalen nga grupe të izoluara interesi”.
Postimi i plotë
Sot të gjithë po e shohin qartë atë për të cilën kemi paralajmëruar ndër vite. KPK prej kohësh është e kapur nga grupe interesi që nuk e kanë prioritet përmirësimin e sistemit prokurorial, por mbrojtjen e interesave të tyre dhe të individëve jashtë Këshillit.
Ky është një realitet i hidhur, por i pamohueshëm.
Reforma në KPK pritet të jetësohet në janar 2026, dhe ky është një hap i domosdoshëm për rikthimin e integritetit në institucion.
Që nga viti 2021, kur kemi nisur reformat në drejtësi, synimi ka qenë i qartë, heqja e kontrollit të një rrethi të ngushtë njerëzish, rritja e transparencës dhe llogaridhënies, eliminimi i ndikimit të grupeve të interesit që e kanë përdorur institucionin për interesa personale e grupore, forcimi i meritokracisë mbi lidhjet apo klanet, dhe krijimi i një institucioni që funksionon në shërbim të publikut, jo të individëve të privilegjuar.
Shumicës së anëtarëve aktualë të KPK-së kjo reformë u ka penguar që nga dita e parë. Ata kanë përdorur çdo mjet të mundshëm për ta bllokuar, por nuk ia dolën dhe nuk do t’ia dalin, sepse drejtësia dhe interesi publik nuk mund të ndalen nga grupe të izoluara interesi.
