Ushtruesja e detyrës së Presidentes së Kosovës, Albulena Haxhiu, ka uruar Ditën Memoriale të Komunitetit Egjiptian, duke vlerësuar historinë, kujtesën dhe kontributin e këtij komuniteti në Kosovë.
Përmes një postimi publik, Haxhiu theksoi se kjo ditë shërben si kujtesë se Republika e Kosovës është ndërtuar edhe nga përvojat, puna dhe qëndresa e komuniteteve që kanë pasuruar jetën shoqërore të vendit dhe kanë kontribuar në zhvillimin e tij politik e demokratik.
Ajo nënvizoi se institucionet e vendit mbeten të përkushtuara për ndërtimin e një shoqërie gjithëpërfshirëse, ku secili komunitet gëzon respekt, njohje dhe trajtim të dinjitetshëm.
“Në këtë ditë, riafirmojmë përkushtimin për një Kosovë ku çdo komunitet njihet, respektohet dhe trajtohet me dinjitet”, ka deklaruar Haxhiu.
Në fund të mesazhit të saj, ushtruesja e detyrës së Presidentes uroi të gjithë pjesëtarët e komunitetit egjiptian me rastin e Ditës Memoriale të tyre.
