Kandidati për deputet nga Lëvizja Vetëvendosje, Mytaher Haskuka, me numër 50 në listë, ishte mysafir në një emision të TV Prizreni, ku foli për arritjet e qeverisjes pesëvjeçare të LVV-së në nivel qendror, duke veçuar shtrirjen e sovranitetit të Kosovës në veri si një nga sukseset kryesore.
I pyetur se me çfarë do të krenohej pas pesë viteve të qeverisjes së Vetëvendosjes, Haskuka tha se shumë nga veprimet që sot shihen si të arritura historike nuk ishin premtime të drejtpërdrejta, por u realizuan me një qasje të matur dhe të qëndrueshme.
“Ne nuk kemi thënë se do t’i shpërbëjmë të gjitha strukturat paralele të Serbisë në Kosovë, por të gjitha këto i kemi arritur hap pas hapi”, deklaroi Haskuka.
Ai rikujtoi se një nga vendimet e para të Qeverisë Kurti ishte ndalimi i referendumit dhe zgjedhjeve të Serbisë në territorin e Kosovës, vendim i cili atëkohë ishte kritikuar nga analistë dhe figura publike, duke paralajmëruar pasoja për raportet me aleatët ndërkombëtarë.
“Shumë analistë thoshin se ky ishte fundi i Kosovës dhe se po hynim në konflikt me miqtë tanë ndërkombëtarë. Por koha tregoi të kundërtën”, theksoi ai.
Sipas Haskukës, pas këtij hapi, Qeveria Kurti vazhdoi me masa konkrete për forcimin e rendit dhe ligjit në veri: u ndalua përdorimi i dinarit serb, u mbyllën bankat dhe Posta e Serbisë në Kosovë, u shpërbënë strukturat paralele, u hoqën kamerat ilegale që monitoronin qytetarët, u mbyllën kalimet ilegale dhe u ndal kontrabanda.
Ai përmendi gjithashtu mbylljen e fermave ilegale të kriptovalutave dhe ndërprerjen e praktikës së mos-pagesës së energjisë elektrike në veri, duke e cilësuar këtë si rikthim të barazisë para ligjit për të gjithë qytetarët.
“Të gjitha këto masa çuan në shtrirjen reale të sovranitetit të Kosovës në të gjithë territorin e saj”, tha Haskuka.
.
