Deputeti i Lëvizjes Vetëvendosje, Mytaher Haskuka, u ka bërë thirrje bashkatdhetarëve që jetojnë në mërgatë të shfrytëzojnë të drejtën e tyre për të votuar në procesin e ardhshëm zgjedhor.
Përmes një video-mesazhi, Haskuka njoftoi se procesi i regjistrimit tashmë ka filluar, duke e cilësuar atë si hapin kryesor për të gjithë ata që duan të japin mendimin e tyre për qeverisjen në Kosovë, qoftë përmes ambasadave, konsullatave apo me postë.
“Pavarësisht kritikave në media, diaspora gëzon të drejtën e votës, e cila është e garantuar me Kushtetutë. Ju duhet të jepni mendimin tuaj për qeverisjen në Kosovë”, deklaroi ai.
Haskuka theksoi se pjesëmarrja masive e mërgatës është e domosdoshme për zhvillimin e vendit dhe për tejkalimin e, siç e quajti ai, “bllokadës që i ka ndodhur Kosovës për më shumë se një vit”.
Ai inkurajoi mërgimtarët që të regjistrohen përmes faqes zyrtare të KQZ-së.
Detaje të procesit:
Periudha e regjistrimit: 6 maj – 17 maj 2026
Mënyrat e votimit: në ambasada, konsullata ose përmes postës
Votimi fizik në Kosovë: 7 qershor 2026
