Deputeti i Aleancës për Ardhmërinë e Kosovës, Daut Haradinaj, ka reaguar ashpër ndaj dështimeve të njëpasnjëshme të Lëvizjes Vetëvendosje për konstituimin e institucioneve. Përmes një postimi në rrjetet sociale, Haradinaj thekson se për të 21-ën herë me radhë, VV ka dështuar në këtë proces, duke e cilësuar situatën si të papranueshme dhe të dëmshme për vendin.
“Pas çdo seance të dështuar, po bëhet më e qartë se deputetët e VV-së janë tashmë të kapur peng nga Albin Kurti, i cili për vete i paska siguruar numrat,” shkruan Haradinaj.
Ai i bën thirrje deputetes Albulena Haxhiu dhe kolegëve të saj nga VV që të reflektojnë dhe t’i kërkojnë Kurtit të njëjtët numra që thuhet se i ka për krijimin e qeverisë, që t’i vë në dispozicion edhe për votimin e kryetares së Kuvendit.
“Si mund të kuptohet sigurimi i numrave për Albin Kurtin e jo edhe për Albulena Haxhiun?” pyet Haradinaj, duke shtuar se barra e përgjegjësisë është tani mbi deputetët e VV-së.
Në përfundim, ai i drejtohet personalisht Kurtit me një mesazh të qartë: “Albin, mos e lë Albulenën në baltë. Jepja votat tua edhe asaj. Nëse ti nuk ke besim në të, atëherë ndërroje kandidatin dhe gjeje një më të besueshëm.”
Ky reagim i Haradinajt vjen në një kohë kur vendi po përballet me një bllokadë institucionale që po zgjat për javë të tëra, me pasoja të drejtpërdrejta në funksionimin e shtetit dhe proceset demokratike.
