Nga e hëna, Prishtinës i është shtuar edhe një qendër ku mund të kryhen testet për COVID-19.
Drejtori i Shëndetësisë në Komunën ne Prishtinës, Izet Sadiku, ka njoftuar se qendra është hapur në Qendrën Mjekësore Familjare numër 4 në lagjen “Xhemal Ibishi”.
“Duke parë që ditëve të fundit është rritur numri i rasteve me COVID19 që ka ndikuar në rritjen e kërkesës për testim për COVID19, nga sot e kemi hapur edhe një qendër për testim”, ka shkruar Sadiku në Facebook të hënën.
Orari për testim në këtë qendër është nga ora 8:00 deri në orën 15:00, nga e hëna në të premten.
Ndërkohë, në Qendrën e Studentëve, testimet kryhen gjatë gjithë ditëve të javës, nga ora 8:00 deri në orën 16:00.
Javëve të fundit është shtuar dukshëm numri i të prekurve me COVID-19, shpesh edhe duke kaluar 1000-shin, e si pasojë po regjistrohen çdo ditë edhe vdekje.
