Pep Guardiola ka zbuluar se çfarë do të bëjë në rast se Manchester City dënohet për shkelje të rregullave të Fair-play financiar.
Javën e kaluar, u konfirmua se Evertoni është dënuar me heqje të dhjetë pikëve në Ligën Premier pikërisht për shkak të thyerjes së këtyre rregullave.
“Një komision i pavarur ka vendosur një zbritje të menjëhershme prej 10 pikësh për Everton FC për shkelje të rregullave financiare”.
“Liga Premier lëshoi një ankesë kundër klubit dhe ia referoi çështjen një komisioni të pavarur në fillim të këtij viti”, thuhej në deklaratën e lëshuar nga Liga Premier.
Që kur u konfirmua dënimi i Evertonit, vëmendja ka kaluar te dënimi i mundshëm i Cityt pasi u raportua se klubi është nën hetim për gjoja shkeljen e rregullave financiare gjatë një periudhe prej nëntë sezonesh.
Duke folur për mediat përpara ndeshjes së Cityt në Ligën Premier kundër Liverpool këtë vikend, Guardiola u pyet për të ardhmen e tij nëse kampionët e Anglisë shpallen fajtorë.
“Unë nuk do ta konsideroj të ardhmen time nëse jemi në ligën e dytë, me shumë mundësi do të qëndroja”, ka thënë fillimisht Guardiola.
Tutje, ai refuzoi të jap një koment rreth dënimit me heqje pikësh për Evertonin.
“Unë nuk do të them asnëj fjalë për Evertonin sepse nuk e di realisht se çfarë ka ndodhur. Janë dy raste krejtësisht të ndryshme. E di që njerëzit thonë pse City nuk po shkon në Ligën e Konferencës, por le të presim”.
“Ju lexoni, por askush nuk e di në fakt çfarë po ndodh në të vërtetë. Të gjithë ata që e thonë nuk e dinë saktësisht se çfarë ka ndodhur. Nuk i kam lexuar të gjitha. Por prisni, çfarë thashë një muaj më parë, nëse kemi bërë diçka të gabuar, do të ndëshkohemi”.
“Pas asaj që do të bëhet, unë do të jem këtu, sa i përket çështjes së Everton nuk e di se çfarë ndodhi, por është krejtësisht ndryshe. Kjo është arsyeja pse nuk mund ta krahasoni atë”, përfundoi tekniku spanjoll.
