Deputeti i Partisë Demokratike të Kosovës, Përparim Gruda, ka reaguar përmes një videoje të publikuar në rrjete sociale lidhur me aktgjykimin e fundit të Gjykatës Kushtetuese, që ka të bëjë me konstituimin e Kuvendit të Kosovës. Sipas tij, përgjegjësia për konstituimin e Kuvendit i takon ekskluzivisht partisë më të madhe parlamentare, që në këtë rast është Lëvizja Vetëvendosje.
Duke iu referuar paragrafit 130 të aktgjykimit, Gruda ka deklaruar:
“Në asnjë fjalë, nuk i ngarkohet asnjë detyrim grupeve tjera parlamentare. I vetmi detyrim që i ngarkohet është grupit parlamentar më të madh që ka të drejtën për me e propozu.”
Por këtë interpretim e ka kundërshtuar deputeti i Lëvizjes Vetëvendosje, Artan Abrashi. Përmes një postimi në Facebook, ai ka ndarë një pjesë tjetër të të njëjtit paragraf, të cilën sipas tij, Gruda e ka anashkaluar.
Sipas Abrashit, Gruda ka shmangur qëllimisht një pjesë kyçe të vendimit të Kushtetueses, duke e cituar të cunguar dhe në funksion të qëndrimeve politike të PDK-së.
“Po të kishin argumente, nuk do të kishin nevojë për të manipuluar. Po të ishte paragrafi në favor të tyre, nuk do të kishte nevojë të coptohej”, ka shkruar Abrashi në një postim në rrjete sociale.
Ai ka përmendur konkretisht paragrafin 130 të aktgjykimit të Gjykatës Kushtetuese, i cili sipas tij rrëzon tërësisht pretendimet e PDK-së. Në këtë paragraf, Kushtetuesja thekson:
“Njëkohësisht një detyrim i tillë vlenë edhe për grupet tjera parlamentare të cilët, në frymën e bashkëpunimit dhe konsultimeve konstruktive, propozojnë kandidatët për nënkryetarë të Kuvendit, të cilët, bazuar në paragrafët 3 dhe 4 të nenit 67 të Kushtetutës, po ashtu zgjidhen me shumicën e votave të të gjithë deputetëve”, thuhet në pjesën e cituar nga Abrashi.
Sipas Abrashit, kjo pjesë e vendimit dëshmon qartë që edhe grupet opozitare kanë përgjegjësi për bashkëpunim konstruktiv në konstituimin e organeve të Kuvendit dhe se të gjitha emërimet kërkojnë shumicën e votave të deputetëve.
