Greqia godet 4 organizata shqiptare të trafikut të drogës.
Sipas policisë greke personat akuzohen se si pjesë e organizatave, që kanë pasur edhe bashkëpunim me njëra tjetrën, kanë importuar drogë në Greqi, kryesisht marijuanë në rreth 1 tonë e 780 kilogramë.
Po kështu të arrestuarit dyshohen, sipas policisë greke, se kanë trafikuar kokainë, nga Spanja në Shqipëri dhe Greqi, të fshehur në kamionë me produkte të ligjshme.
Sasia e drogës së qarkulluar nga këto rrjete të drogës, sipas policisë greke, shkon në mbi 8 milionë dollarë.
Sipas policisë greke bazuar në të dhënat e komunikimeve përmes aplikacioneve të koduara “Sky ECC” dhe “EncroChat “ të cilat tani janë në duart e policisë greke është hedhur dritë për 70 raste të trafikut të drogës që përfshinin periudhën nga marsi 2020 deri në mars 2021.
Sipas policsë greke, një nga personat e dyshuar në një nga rrjete e trafikut të drogës është Aleksandër Sadikaj, i cili u vra në Shqipëri në një atentat nga shpërthimi i një bombe në makinën e tij në qershor të vitit 2022.
Policia greke tha se një rol te rëndësishëm në një nga organizatat kishte edhe një 36-vjeçare greke, e akuzuara kryesore në rastin e trafikimit të 1.5 ton kokainë në Mimizan, në jug të Francës, në korrik të vitit 2017.
Polica greke ka hedhur dritë edhe se si anëtarët e rrjetit përdornin aplikacionet e koduara.
“Nëpërmjet aplikacioneve specifike, përdoruesit mund të shkëmbenin mesazhe të koduara që vetëshkatërroheshin pasi dërgoheshin, ndërsa kodet speciale të sigurisë , PIN, ishin vënë për të përdorur pajisjet celulare të modifikuara posaçërisht” , thotë policia greke.
Sipas hetimeve policore greke çdo përdorues paguante 1500 euro në muaj për të përdorur aplikacionet.
Në periudhën 2020-2021, agjencia europiane policore “ Europol” së bashku me autoritetet kombëtare policore të Francës, Belgjikës dhe Holandës arritën të godasin aplikimet e koduara “Sky ECC” dhe “EncroChat “ dhe t’ua shpërndanin më pas komunikimet e organizatave kriminale homologëve të tyre në shumë vende, përfshi edhe Greqinë dhe Shqipërinë./ VOA
