Një ngjarje e rëndë raportohet të ketë ndodhur në Ferizaj.
Një qytetar nga kjo komunë ka qenë cak i një sulmi të armatosur, ku persona të dyshuar ia kanë marrë 770 euro.
Siç njofton policia rasti ka ndodhur mbrëmë rreth orës 19:10, kur disa persona së pari e kanë goditur me veturë dhe mandej nën kërcënimin e armëve e kanë grabitur qytetarin.
“Viktima mashkull kosovar ka raportuar se derisa ka qenë duke u kthyer në shtëpi me veturë, fillimisht është goditur nga një veturë e më pas nga ajo veturë kanë dalë katër (4) të dyshuar, ku tre (3) prej tyre kanë qenë të armatosur me AK 47. Të dyshuarit viktimës ia kanë marrë 770 euro”, njofton policia.
Kjo ngjarje thuhet të ketë ndodhur në Bablak, vendbanim ky krejt afër magjistrales Prishtinë-Ferizaj.
Në lidhje me rastin është konsultuar prokurori i shtetit dhe rasti sipas policisë vazhdon të hetohet.