Zyra e Presidentes së Kosovës ka thënë se Gjykata Kushtetuese nuk e ka hedhur poshtë dekretin e presidentes Osmani për shkarkimin e ambasadorit Avni Kastrati.
Në një postim në faqen e Facebookut, ZPK ka thënë se ky lajm i publikuar në disa mediume, është i pasaktë.
Aty theksohet se Gjykata Kushtetuese nuk ka bërë ndonjë vlerësim të kësaj çështjeje por thjeshtë e ka kthyer në Rivendosje në Gjykatën Themelore në Prishtinë.
Reagimi i plotë:
Gjykata Kushtetuese nuk e ka hedhur poshtë dekretin e Presidentes
Lajmi i publikuar në disa mediume se “Kushtetuesja hedh poshtë dekretin e Presidentes për shkarkimin e Avni Kastratit si ambasador i Kosovës në Slloveni”, është i pasaktë. Në fakt, Gjykata Kushtetuese fare nuk e ka bërë vlerësimin e kushtetutshmërisë së dekretit të Presidentes.
Zyra e Presidentes së Republikës së Kosovës është njoftuar sot nga Gjykata Kushtetuese se parashtruesi i kërkesës para Gjykatës Kushtetuese ka pretenduar se gjykatat e rregullta kishin shkelur të drejtat dhe liritë e tij themelore të garantuara me Kushtetutë.
Si rrjedhojë, Gjykata Kushtetuese ka vendosur ta kthej këtë çështje në Rivendosje në Gjykatën Themelore në Prishtinë. Pra, në asnjë rrethanë nuk kemi të bëjmë me hedhje poshtë të dekretit të Presidentes, meqë Gjykata Kushtetuese nuk ka bërë vlerësim të kushtetutshmërisë së dekretit të Presidentes”.
