Bundestagu Gjerman ka miratuar sot Ligjin për fuqinë e kualifikuar punëtore, me të cilin lehtësohet marrja e punëtorëve nga vendet e tjera.
Bahri Cani nga gazeta Deutsche Welle ka thënë se deri në futjen në fuqi duhet të kalojnë disa procedura, por se me Ligjin e ri parashikohen ndryshime dhe lehtësime të shumta, për ardhjen e punëtorëve të huaj të kualifikuar në Gjermani.
“Me këtë ligj parashikohet lehtësimi i njohjes së diplomave dhe kualifikimeve që do të thotë që të huajt nëse i plotësojnë kushtet e tjera mund të vijnë në Gjermani dhe pa njohjen paraprake të diplomave dhe njohjen mund ta bëjnë pasi të vijnë këtu”, tha ai.
Nga ky ligj i ri mund të përfitojnë edhe vendet e Ballkanit Perëndimor, ku bën pjesë edhe Kosova.
Lehtësirat ligjore që kaluan sot janë mirëpritur nga sipërmarrja e lirë gjermane, që tashmë pret më shumë njerëz për t’i punësuar pasi evitohen kostot dhe burokracitë.
Me ndryshimin e ligjit për imigrimin e fuqisë punëtore të kualifikuar, koalicioni tripartiak në pushtet në Gjermani kërkon të lehtësojë ndjeshëm imigrimin e punëtorëve të kualifikuar.
Në të ardhmen, të huajt nga vendet jo anëtare të BE-së mund të shkojnë në Gjermani për të kërkuar punë me një “kartë shansi” bazuar në një sistem pikësh. Madje shanse kanë edhe ata që nuk janë të kualifikuar, por që gjejnë një kontratë pune.
Ndërkohë ata që përfitojnë më shumë nga ky projektligji do jenë profesionistët me diplomë dhe përvojë pune të cilët mund të punojnë në Gjermani pa pasur nevojë që t’u njihet diploma nga ky shtet.
Vitet e fundit, drejt Gjermanisë kanë emigruar dhe një numër i madh shqiptarësh të cilët janë bërë pjesë e sistemit mjekësor të këtij vendi, por dhe që punojnë me kontrata pune në sektor të ndryshëm.
