Policia e Kosovës njofton se është gjetur i vdekur në Prevallë, personi që ishte raportuar i zhdukur në Prizren më 27 tetor.
Lajmi u bë i ditur përmes raportit 24 orësh të policisë, ku thuhet se trupi i pajetë i viktimës është gjetur të shtunën.
“Raportohet se me datë 05.11.2022 në afërsi të Prevallës është gjetur trupi i viktimës mashkull kosovar. Ekipi i emergjencës e ka konstatuar se trupi i viktimës është pa shenja jete. Në teren kanë qenë të angazhuara edhe ekipet e kërkim shpëtimit të FSK-së”, thuhet në njoftim.
Bëhet e ditur se me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion.
