Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, Donika Gërvalla sot takoi kryesuesin e Odës Ekonomike të Abu Dhabit – Abdullah M. Mazrui.
Në këtë takim u diskutua për mundësi bashkëpunimi dhe investimi në industri të ndryshme në Kosovë.
Fillimisht ministrja e njoftoi delegacionin pritës rreth potencialit që qytetarët e Kosovës po e ofrojnë përmes punës së mrekullueshme në shumë sektorë. Ajo theksoi nevojën për thellim të bashkëpunimit mes sektorit privat në bashkëpunim me qeveritë e të dy vendeve si ndërmjetësuese dhe fuqizuese të investimeve të reja.
Pastaj ministrja Gërvalla u informua rreth pritjeve dhe detajeve të vyera, në mënyrë që të hidhen hapa konkret dhe të pa vonuar përmes ekipeve të dedikuara për konkretizim të ideve.
Së fundmi, Gërvalla shprehu gatishmërinë e madhe që Republika dhe qytetarët e Kosovës kanë për të punuar së bashku në ngritjen e kapaciteteve dhe nivelit të ekonomisë e tregtisë.
