Ministrja e Punëve të Jashtme dhe Diasporës Donika Gërvalla përmes një postimi në Facebook ka reaguar lidhur me raportimet sipas të cilave konsulli në New York Lulzim Krasniqi është shkarkuar për shkak se gjoja ministrja Gërvalla ka kërkuar largimin e flamurit të UÇK-së nga zyra e konsullit.
Gërvalla ka thënë se në ministrinë që ajo drejton punësimet do të bëhen me meritokraci dhe profesionalizëm ndërsa punësimet ilegale dhe të jashtëligjshme janë shfuqizuar dhe do të shfuqizohen sapo të gjenden shkelje të tilla duke thën se nuk ka gënjeshtër, përrallë, shpikje, presion apo kërcënim që e ndal këto reforma.
Më poshtë reagimi i znj.Gërvalla
“Kemi premtuar meritokracinë dhe profesionalizmin si kriter të vetëm për punësim në institucionet e Republikës. Asgjë më shumë e asgjë më pak nuk është duke ndodhur në Ministrinë e Punëve të Jashtme dhe Diasporës. Për këtë flet edhe konfirmimi i vendimeve tona nga ana e instancave të ankimimit.
Prandaj, punësimet ilegale, të jashtëligjshme në këtë ministri, të bëra në të kaluarën, janë shfuqizuar. Nëse ndërkohë do të konstatohen të tjera, të cilat ende nuk kanë dalë në pah, edhe ato do të shfuqizohen. Nuk ka gënjeshtër, përrallë, shpikje, presion apo kërcënim që e ndal reformën e domosdoshme institucionale.
Nepotizmi dhe punësimet e paligjshme e kanë dëmtuar rëndë diplomacinë tonë.
Prandaj: Drejtësi, barazi, llogaridhënie dhe meritokraci në punësim, vlerësim të punës, ngritje në pozitë, dërgim jashtë vendit. Kjo është formula e një funksionimi më të mirë të MPJD-së dhe e një përfaqësimi më dinjitoz të Republikës së Kosovës jashtë vendit”
