Sot shënon 25 vjetori i fillimit të bombardimeve të NATO-s ndaj caqeve serbe, duke ndihmuar kështu në lirinë e Kosovës.
Këtë ditë e kanë kujtuar shumë qytetarë e zyrtarë politik, duke falënderuar kështu NATO-n dhe ish-presidentin e Amerikës Bill Clinton.
Ndër ta falënderimet e saj i ka shprehur edhe Ministrja e Punëve të Jashtme dhe Diasporës, Donika Gërvalla.
“Për herë të parë që nga themelimi i saj, NATO po vepronte me forcë dhe po e bënte këtë për të mbrojtur jetën e njerëzve të pafajshëm, për të ruajtur paqen botërore dhe për të shpëtuar shqiptarët e Kosovës nga shfarosja”, ka thënë Gërvalla përmes një postimi.
“Po, si e gjetën sulmet ajrore të NATO-s shqiptarin e Kosovës? Kur u dëgjuan shpërthimet e para mbi makinerinë e mbi objektet serbe, shqiptari i Kosovës tashmë kishte mbushur një shekull që po luftonte kundër pushtimit, kolonizimit, robërisë, urisë, dhunës sistematike, shpërnguljes, dehumanizimit e përbuzjes. Shqiptari i Kosovës kishte qëndruar me forcat e veta kundër elaborateve e planeve të sofistikuara për pastrim etnik e deportim masiv e të plotë.
Me një fjalë, kur zogjtë e hekurt të aleancës së NATO-s po niseshin drejt makinerisë vrastare serbe, shqiptarët e Kosovës po mbushnin një shekull që kishin derdhur djersën, lotin e gjakun për të jetuar të qetë e me dinjitet në tokën e tyre, Kosovën. Ata kishin dëshmuar vendosmëri, qëndresë, durim, përpjekje mbinatyrore e këmbëngulëse, gjakim për paqe, por edhe luftë kundër robërisë e për mbijetesë”, shtoi më tutje ajo.
“Bashkë me bombat e projektilët superprecizë ndaj shtypësve serbë, NATO po kthente drejtësinë e munguar, po shpëtonte shqiptarët e Kosovës, po e sillte lirinë e demokracinë”, vazhdoi më tutje ajo, duke thënë se gjatë kësaj periudhe në Kosovë kishte qëndrueshmëri, durim e guxim, si tek trupat e NATO-s ashtu edhe tek burrat, grate e fëmijët e Kosovës.
