Publikimi në media i një audio-incizimi nga takimi i U.D. Kryeprokurorit të Shtetit me kryeprokurorët e prokurorive më 20 janar 2026 është vlerësuar si shqetësues dhe si pasqyrë e gjendjes në të cilën ende ndodhet sistemi prokurorial në vend.
Zëvendëskryeministrja dhe ministrja e Punëve të Jashtme, Donika Gërvalla, ka theksuar se reforma në sistemin prokurorial dhe në drejtësi në përgjithësi ka qenë dhe mbetet ndër prioritetet kryesore të Republikës së Kosovës.
Ajo ka rikujtuar se më 5 qershor 2025 kanë hyrë në fuqi ndryshimet e Ligjit për Këshillin Prokurorial të Kosovës, duke shënuar fillimin e jetësimit të reformës në sistemin prokurorial, me synim eliminimin e korporatizmit dhe grupacioneve të ndryshme brenda sistemit, si dhe forcimin e drejtësisë, profesionalizmit, llogaridhënies dhe transparencës.
Sipas saj, gjuha dhe diskutimet denigruese të krerëve dhe ish-krerëve të sistemit prokurorial, si dhe kundërshtimi dhe rezistenca e vazhdueshme ndaj reformave dhe mungesa e vullnetit për zbatimin e tyre, paraqesin rrezik serioz dhe cenojnë rëndë integritetin dhe funksionimin profesional të sistemit prokurorial.
“Dënojmë ashpër gjuhën e tillë denigruese, e cila është në kundërshtim me etikën dhe standardet profesionale të prokurorit, por njëkohësisht kërkojmë zbatimin e reformave dhe ndryshimeve ligjore tashmë në fuqi, për t’i dhënë sistemit prokurorial profesionalizmin, llogaridhënien dhe efikasitetin e munguar”, ka deklaruar Gërvalla.
Ajo ka shtuar se reformat në drejtësi janë dëshmi e vendosmërisë për ndërtimin e një shteti ku ligji nuk negocion, përgjegjësia nuk shmanget dhe drejtësia nuk njeh emër, pozitë apo ndikim.
