Ministrja e Drejtësisë në detyrë, Donika Gërvalla, ka theksuar rëndësinë e ndihmës juridike falas si një mekanizëm që garanton mbrojtje ligjore për qytetarët, pavarësisht gjendjes së tyre ekonomike.
Ajo ka bërë të ditur se ky shërbim ofrohet përmes zyrave rajonale për ndihmë juridike falas në të gjithë Kosovën, përfshirë edhe Zyrën Rajonale në Pejë, duke u mundësuar qytetarëve qasje të drejtpërdrejtë dhe të lehtë në mbështetje juridike.
Sipas Gërvallës, ndihma juridike falas u mundëson qytetarëve qasje reale në drejtësi, duke i ndihmuar në përballimin e proceseve ligjore dhe në mbrojtjen e të drejtave të tyre.
“Ndihma juridike falas është garancia që askush nuk mbetet pa mbrojtje ligjore për shkak të gjendjes ekonomike”, ka theksuar ajo.
Ministrja në detyrë ka shtuar se forcimi dhe funksionimi efikas i këtij shërbimi mbetet thelbësor për një sistem drejtësie që është i qasshëm dhe i drejtë për të gjithë qytetarët.
