Leicester City ka konfirmuar largimin e legjendës së klubit, Jamie Vardy, në fund të sezonit 2024/25.
Sulmuesi 38-vjeçar do t’i japë fund një kapitulli të jashtëzakonshëm që zgjati plot 13 vite, duke lënë pas vetes një trashëgimi të jashtëzakonshme në historinë e klubit.
Vardy iu bashkua Leicesterit në vitin 2012 nga Fleetwood Town për një shumë modeste prej 1 milionë euro.
Ai u shndërrua në ikonën e klubit, duke regjistruar gati 500 paraqitje dhe pothuajse 200 gola – një rekord historik që e bën atë golashënuesin më të mirë të të gjitha kohërave për “Dhelprat”.
Our greatest ever player, Jamie Vardy, will depart Leicester City this summer 💙
— Leicester City (@LCFC) April 24, 2025
Kontributi i tij në titullin e pabesueshëm të Ligës Premier në vitin 2016 dhe fitorja në FA Cup në vitin 2021, e kanë ngulitur emrin e tij përgjithmonë në zemrat e tifozëve.
Edhe këtë sezon, në moshën 38-vjeçare, Vardy vazhdoi të tregojë vlerë, duke shënuar shtatë gola në Ligën Premier, pavarësisht rënies së skuadrës në Championship.
Pas një sezoni zhgënjyes, të cilin vetë Vardy e quajti “turp”, ai kërkoi ndjesë publike për paraqitjet e dobëta të ekipit, duke pranuar se përgjegjësia ishte kolektive.
“Kam pasur 13 vite të pabesueshme në këtë klub – me shumë suksese, disa ulje, por më së shumti momente të jashtëzakonshme. Më dhemb që ka ardhur kjo ditë, por e dija që do të vinte. Dua të falënderoj të gjithë ata që më pranuan si një të vetin. Leicesteri do të mbetet gjithmonë në zemrën time”, ka thënë Vardy.
— Jamie Vardy (@vardy7) April 24, 2025
Megjithëse po largohet nga Leicester, Vardy nuk e ka në plan të varë këpucët në gozhdë. Ai mbetet i hapur për të vazhduar karrierën si futbollist, qoftë në Ligën Premier apo jashtë saj.
Largimi i tij shënon një kapitull të ri për Leicesterin, ndërsa klubi përpiqet të rindërtohet dhe të rikthehet fuqishëm në elitën e futbollit anglez.
