Secilën herë më e afërt është dita kur Javelinët do të jenë në dispozicion të Forcës së Sigurisë së Kosovës.
Tashmë kanë kaluar tridhjetë ditët e parapara për njoftimin e Kongresit të SHBA-së rreth kërkesës së Kosovës për blerjen e këtij sistemi anti-tank, duke e hapur rrugën për blerjen e tyre.
Procedurat, sipas Ministrisë së Mbrojtjes do të fillojnë menjëherë, teksa tregojnë edhe shumë që është planifikuar për të blerë predhat amerikane.
“Nga kjo datë vetëm se jemi duke i pritur ofertat nga Shtetet e Bashkuara të Amerikës, për të vazhduar më pas në procedurat e blerjes duke u bazuar në ofertën, por gjithashtu edhe në planifikimin e FSK-së. Kostoja totale e prokurimit, vlerësohet të jetë 75 milionë dollar amerikanë, ndërsa në këtë pako përfshihet edhe trajnimi i ushtarakëve të FSK-së”, tha Liridona Gashi Zëdhënëse e Ministrisë së Mbrojtjes.
Gashi bën me dije se buxheti ua mundëson që të blejnë edhe armatim të ri, për çka edhe janë duke i bërë planifikimet këtë vit.
Ndërkohë ish ushtaraku Hysen Gecaj është optimist se sistemin Javelin ushtria do ta përvetësojë brenda 2024-tës.
“Unë shpresoj që brenda vitit edhe për shkak të situatës së krijuar në Ukrainë dhe në veri të Kosovës Javelinët do të arrijnë brenda vitit në Kosovë, kështu që në këtë aspekt jam optimist me kusht që mos të kemi ndonjë problem tjetër që mund të ndikojë në anulimin apo zvarritjen e Javelinëve në Kosovë”, tha Hysen Gecaj – ish kolonel i FSK-së.
Po aq të nevojshëm e të domosdoshëm pajisjen pa vonesa e sheh ish koloneli i FSK-së Afrim Veseli.
“Unë shpresoj shumë që Ministria e Mbrojtjes të përshpejtojë hapat në procedurat e tenderimit, për blerjen e tyre dhe ato sa ma shpejt të vijnë në Kosovë dhe të fillojë trajnimi i pjesëtareve të FSK-së për përdorimin e tyre, kjo do të shkojë në favor të mbrojtjes së territorit të vendit. Situata e sigurisë është shumë e brishtë ardhja e këtij sistemi, është tepër i nevojshëm dhe i domosdoshëm”, tha Afrim Veseli – ish kolonel i FSK-së.
Përndryshe, përveç sistemit Javelin Kosova e posedon një sistem antitank të ngjashëm të blerë nga Turqia.
Bëhet fjalë për sistemin Omtas, të cilin edhe e kishin ekspozuar në Defender Europe 23./rtvd
