“Ndërtimi i Tiranës, vizioni i guximshëm arkitektonik që po riformëson kryeqytetin e Shqipërisë”. Me këtë titull, revista prestigjioze “Forbes” i ka kushtuar një reportazh të gjatë ndryshimit të Tiranës gjatë dekadës së fundit.
Nxitja ka ardhur nga festivali “Bukë dhe Zemër”, që mblodhi në kryeqytetin shqiptar mbi 150 arkitektë nga e gjithë bota, të përzgjedhur personalisht nga kryeministri Edi Rama, në një mundësi për të riimagjinuar rrënjësisht Tiranën.
Shkrimi nis me një vlerësim për kryeministrin Rama, që sipas “Forbes”, është një nga nxitësit kryesorë të transformimit të kryeqytetit.
“Ndërtesat e ulëta të qytetit të shekullit të 20-të, të epokës fashiste dhe sovjetike, po bëhen shpejt të zbehta nga një mori rrokaqiejsh eksperimentalë dhe në disa raste jashtëzakonisht të çuditshëm, të projektuar nga arkitektë ndërkombëtarë të profilit të lartë”, shkruan Forbes.
Revista prestigjioze citon kryeministrin Rama se qëllimi nuk është ndërtimi i monumenteve prej guri, por i hapësirave me kuptim. Për këtë, Forbes shkruan se në dispozicion të arkitektëve ndërkombëtarë është vënë Bulevardi i Ri i Tiranës, ku ata mund të lënë të lirë imagjinatën e tyre.
Së shpejti, zemra e kryeqytetit do të jetë shtëpia e apartamenteve luksoze, hapësirave të zyrave të klasit të parë, dyqaneve të nivelit të lartë dhe markave globale të hoteleve.
Në reportazh përmenden disa prej ndërtimeve shumëkatëshe të viteve të fundit në Tiranë, të cilat për nga forma e tyre tërheqin menjëherë vëmendjen.
Por Forbes nënvizon se Tirana ka tashmë edhe një treg imobiliaresh që nuk e ka pasur më parë. Çmimet në qendër janë më shumë se trefishuar për shkak të kërkesës së lartë për të pasur një pronë në këto ndërtesa.
Forbes shkruan se janë të shumta etiketimet që po merr tashmë Tirana: nga “Nju Jorku i ri në Adriatik” te një “Monako e re”, nëse vëren transformimin e bregdetit të Durrësit.
“Kombi që, për katër dekada nën diktatorin Enver Hoxha, e mbylli veten nga bota, tani po i hap krahët përmes arkitekturës”, shkruan Forbes./Tv Klan
