Një flotë ndërkombëtare prej rreth 20 anijesh është nisur nga porti i Barcelonës për të sfiduar bllokadën izraelite ndaj Gazës, duke mbajtur në bord aktivistë, artistë, politikanë, mjekë dhe gazetarë nga e gjithë bota, transmeton KosovaNews.
Kjo iniciativë, e quajtur Flota Globale Sumud, tashmë ka marrë mbështetjen e mbi 44 vendeve dhe synon të dërgojë ndihma humanitare në qytetin e Gazës, duke thyer kështu rrethimin izraelit.
Pas Barcelonës, flotilja do të ndalet në Itali, Greqi dhe Tunizi përpara se të vazhdojë lundrimin në Mesdhe drejt Gazës.
Ndërkaq, është bërë e ditur se arsyeja e nisjes nga ky qytet është se Barcelona, i ka ndërprerë të gjitha marrëdhëniet institucionale me Izraelin pas akuzave për gjenocid në Gaza.
Mes emrave të njohur që marrin pjesë janë aktivistja suedeze Greta Thunberg, aktori irlandez Liam Cunningham, aktori spanjoll Eduardo Fernandez dhe ish-kryetarja e Bashkisë së Barcelonës Ada Colau.
Greta Thunberg: “Po e shikojmë gjenocidin live”
Disa minuta para nisjes, në një konferencë për media në portin e Barcelonës, Greta Thunberg deklaroi se Gaza është shembulli më i qartë i shtypjes, gjenocidit dhe spastrimit etnik.
“ Izraeli po vret dhe bota po e shikon këtë gjenocid drejtpërdrejt. Është tronditëse që njerëzit shikojnë këto pamje në telefon dhe vazhdojnë jetën sikur s’po ndodh asgjë.”
Ajo shtoi se:
“Nëse kjo që po bën Izraeli nuk mjafton për ta nxitur botën të veprojë, atëherë çfarë mund ta bëjë? Heshtja dhe bashkëpunimi i qeverive e bën ato po aq fajtorë sa Izraelin.”
Për mundësinë që flota të ndalet nga ushtria izraelite, Thunberg u përgjigj:
“Plani B është i qartë: do të kthehemi dhe do të nisemi përsëri. Kjo është një mision i pastër, humanitar.”
“Heshtja vret sa bombat”
Nga ana tjetër, aktori spanjoll Eduardo Fernandez tha se: “Gaza është një pasqyrë për të gjithë ne, duam apo s’duam. Çdo anije që shkon atje është një klithmë e dinjitetit njerëzor. Heshtja është bashkëfajësi, dhe heshtja është po aq vdekjeprurëse sa bombat.”
Ndërkohë, edhe aktori irlandez Liam Cunningham publikoi një video të një vajze palestineze të vrarë në Gaza, duke bërë thirrje për sanksione ndërkombëtare kundër Izraelit.
“Mosveprimi i deritanishëm është një dështim i turpshëm historik për botën,” tha Cunningham.
Colau: “Gazës nuk i mungon solidariteti”
Edhe Ish-kryetarja e Barcelonës, Ada Colau, deklaroi se:
“Mobilizimi i shoqërisë civile po i detyron të marrë pozicion institucioneve që nuk kanë guxuar të veprojnë. Izraeli po vret fëmijë, njerëz, po shkel ligjin ndërkombëtar. Gaza nuk është vetëm.”
Aktivistët theksuan se kjo nismë është plotësisht paqësore dhe humanitare.
Çfarë është Flota Globale Sumud?
Fjala “Sumud”, që në arabisht do të thotë “qëndresë” ose “vendosmëri e palëkundur”, lindi pas luftës së vitit 1967 dhe përfaqëson rezistencën e popullit palestinez përmes qëndrimit në tokën e tyre, ruajtjes së identitetit dhe kulturës, si dhe mosbindjes civile pa dhunë.
Ky koncept është shndërruar në një simbol të qëndresës palestineze, shpesh i ilustruar me motive si pema e ullirit dhe gruaja shtatzënë në fshat./KosovaNews/
