Fizikani i njohur kinez, fitues i Çmimit Nobel, Chen Ning Yang ka ndërruar jetë në Pekin të shtunën. Ai ishte 103 vjeç.
Universiteti prestigjioz Tsinghua, ku ai kishte studiuar dhe më vonë kishte dhënë mësim si profesor, tha në një deklaratë se Yang vdiq për shkak të një sëmundjeje, pa dhënë më shumë detaje.
“Profesori Yang është një nga fizikantët më të mëdhenj të shekullit të 20-të. Ai ka dhënë kontribute revolucionare në zhvillimin e fizikës moderne”, thuhet në deklaratën e universitetit, duke vlerësuar gjithashtu kontributin e tij në shkencën dhe arsimin në Kinë.
Chen Ning Yang fitoi Çmimin Nobel në vitin 1957 së bashku me shkencëtarin tjetër kinez, Tsung-Dao Lee. Ata u vlerësuan për studimin e tyre mbi ligjet e simetrisë në natyrë, që çuan në zbulime të rëndësishme për grimcat elementare, sipas faqes zyrtare të Çmimit Nobel, raporton AP.
Ata ishin shkencëtarët e parë me origjinë kineze që fituan Çmimin Nobel në fizikë.Në fjalimin e tij gjatë darkës së ndarjes së çmimeve Nobel, Yang tha se ishte po aq krenar për origjinën e tij kineze sa edhe i përkushtuar ndaj shkencës moderne, e cila është një pjesë e rëndësishme e qytetërimit perëndimor.
Yang, i njohur gjithashtu si Frank apo Franklin, është i njohur edhe për teorinë e famshme Yang–Mills, të cilën e zhvilloi së bashku me fizikantin amerikan, Robert Mills.
Ai lindi në vitin 1922 dhe u rrit në kampusin e Universitetit Tsinghua, ku babai i tij ishte profesor matematike.
Pas përfundimit të studimeve universitare, mori diplomën për studime të nivelit master në Universitetin Tsinghua.
Në vitin 1946, shkoi në Shtetet e Bashkuara për të vazhduar doktoraturën në Universitetin e Çikagos, ku u frymëzua shumë nga fizikani i njohur italo-amerikan Enrico Fermi, fitues i Çmimit Nobel në vitin 1938.
Sipas një raporti të vitit 2017 nga agjencia zyrtare kineze e lajmeve, Xinhua, Yang kishte marrë nënshtetësinë amerikane.
Ai tha atëherë se kjo ishte një vendim i dhimbshëm dhe se babai i tij nuk e kishte falur për këtë.
Në vitin 2015, Yang hoqi dorë nga nënshtetësia amerikane. Ai tha se Shtetet e Bashkuara ishin një vend i bukur që i dha mundësi të mira për të studiuar shkencën. Faqja zyrtare e Çmimit Nobel thotë se Yang kishte tre fëmijë.
