Drejtoria e Shëndetësisë në Prishtinë në bashkëpunim me Drejtorinë e Arsimit, ka filluar vizitat sistematike shëndetësore për nxënësit e shkollave në kryeqytet.
Drejtori për Shëndetësi në Komunën e Prishtinës, Izet Sadiku, ka thënë se bashkë me drejtoreshën e Arsimit, Besiana Musmurati dhe drejtorin e Qendrës Kryesore të Mjekësisë Familjare, Bujar Gashi kanë vizituar shkollën fillore “Shkëndija” në Hajvali, për të parë nga afër procesin e vizitave sistematike të nxënësve në shkollat e kryeqytetit.
“Këto vizita realizohen nga stafi mjekësor i kujdesit parësor shëndetësor pas vitit akademik 2018\19 dhe kanë si synim kontrollin shëndetësor të të gjithë nxënësve të klasave I, V dhe IX në të gjitha shkollat me qëllim të zbulimit dhe parandalimit të sëmundjeve, promovimin e shëndetit dhe edukimin shëndetësor”, ka shkruar Sadiku në Facebook.
Gjatë këtyre vizitave, ka thënë se do të identifikohen shumë patologji, të cilat sipas tij, do të ndihmojnë Drejtorinë e Shëndetësisë të merr masat e duhura për evitimin e tyre në të ardhmen.
