Federata e Futbollit e Rumanisë ka lëshuar deklaratë zyrtare për incidentet që ndodhën në ndeshjen e së premtes mbrëma mes Rumanisë dhe Kosovës. Ndeshja u ndërpre në minutat shtesë pas thirrjeve “Serbia, Serbia”, ndërsa Federata rumune ka shprehur dëshpërimin me sjelljet e delegacionit të Kosovës dhe lojtarëve kosovarë.
“Ne besojmë se akuzat nga ekipi mysafir janë pa bazë dhe besojmë fuqishëm që veprimi i tyre ishte i paramenduar. FRF-ja falënderon afër 50 mijë rumunë që ishin prezent në stadium, për sjelljet civilizuese dhe që shmangën, për aq sa ishte e mundur, reagimin në sfidat nga lojtarët e Kosovës”, shkruan në komuniktën zyrtare të federatës rumune.
Kjo organizatë ka shkruar se gjatë ndeshjes nuk ka pasur thirrje raciste dhe se asnjëherë nuk është dëgjuar thirrja “Kosova është Serbi”. Sipas federatës rumune, slogani “Kosova është Serbi” nuk mund të klasifikohet si racist, bazuar në vendimin e kaluar të UEFA-s për incidentet e vitit të kaluar në Bukuresht. Rrjedhimisht, thotë federata rumune, nuk mund të ndjeket procedura prej tre hapave.
Në federatën rumune thonë se pala kosovare i kanë ditur pasojat kur lojtarët kosovarë u janë drejtuar dhomave të zhveshjes.
Rumunët thonë se kjo është bërë pasi u kuptua se nuk ka kohë për të arritur rezultatin e dëshiruar në fushë.
Për incidentet pas ndeshjes në hapësirat e stadiumit, federata rumune thotë se janë inicuar nga një anëtar i delegacionit të Kosovës.
“Sjellja e delegacionit kosovar, sidomos e lojtarëve kosovarë në Bukuresht, shërben si shembull se si mos të veprohet në sportin profesional. Ne presim tani vendimin e UEFA-s. Mund të jetë vetëm një rezultat, në linjë me principet e ndeshjet”, shkruan tutje federata rumune.
