Deçan – Lëvizja Vetëvendosje ka zyrtarizuar kandidaturën e Faton Selmanajt për kryetar të komunës së Deçanit, në një aktivitet të mbajtur me pjesëmarrjen e Kryeministrit Albin Kurti, Sekretarit të Përgjithshëm Alim Rama dhe aktivistëve të qendrës së partisë në këtë komunë.
Sipas VV-së, Selmanaj, i cili njihet si përfaqësues i gjeneratës së re të udhëheqjes, ka synim fuqizimin e bujqësisë si motor të ekonomisë lokale, zhvillimin e turizmit malor e kulturor dhe ofrimin e shërbimeve publike efikase për të gjithë qytetarët, pa dallim.
Në fjalën e tyre, përfaqësuesit e Lëvizjes theksuan se me Selmanajn në krye, Deçani do të bëhet shembull i qeverisjes lokale që ecën në hap me zhvillimin shtetëror, duke u bërë partner i fortë i qeverisë qendrore.
Zgjedhjet për kryetar të komunës së Deçanit pritet të mbahen më 12 tetor, ku Vetëvendosje synon të çojë përpara zhvillimin e komunës “me punë, guxim dhe besim se e ardhmja ndërtohet së bashku”.
Nga tokat pjellore te majat e bjeshkëve, Faton Selmanaj e njeh çdo cep të Deçanit dhe ka vendosur ta kthejë këtë pasuri…
Posted by Lëvizja VETËVENDOSJE! on Tuesday, August 12, 2025
