Agjencia për Informim dhe Privatësi evidentuar disa raste të mashtrimeve digjitale që po qarkullojnë në rrjetet sociale dhe platformat online, ku shfrytëzohen emrat e personazheve publikë, emrat e bizneseve të njohura dhe oferta të rreme kredie me qëllim të mashtrimit dhe përfitimit të paligjshëm nga qytetarët.
AIP ka njoftuar se bazuar në raportimet publike dhe verifikimet, janë identifikuar disa forma më të shpeshta të mashtrimeve, si: Keqpërdorimi i imazhit të artistëve për postime dhe reklama mashtruese; Oferta të rreme për kredi në emër të bankave të njohura, duke kërkuar të dhëna personale nga qytetarët; Postime dhe video mashtruese që premtojnë kupona dhuratë në emër të marketeve të mëdha si “VivaFresh”, “ETC” dhe bizneseve të tjera të njohura; Konkurse të rreme online që shfrytëzojnë logot e institucioneve dhe kompanive të besueshme për të mbledhur të dhëna nga qytetarët.
AIP u ka bërë thirrje qytetarëve që të përdorin vetëm faqe dhe aplikacione zyrtare të institucioneve dhe bizneseve për informacione e shërbime, që çdo ofertë kredie me norma të ulëta interesi, dhurate a kuponi “falas” të konfirmohet me bankën. Po ashtu, Agjencia bën thirrje që të mos ndahen të dhënat personale në burime të pasigurta, të kontrollohen linqet e faqeve dhe të mos klikohet në linqe të dyshimta.
AIP paralajmëron se lojëra, kuize ose video që premtojnë fitime të menjëhershme, përdoren për mashtrime online, prandaj duhet të mos klikohet në to.
“Çdo faqe apo përmbajtje e dyshimtë duhet të raportohet menjëherë në platformën përkatëse (Facebook, Instagram, TikTok). Instaloni mbrojtje teknike (antivirus, fireëall), përdorni verifikimin me dy hapa (2FA) dhe shmangni rrjetet publike Wi-Fi për qasje bankare”, thuhet në rekomandimet e AIP.
